Aprèp 6 ans de trabalh, lo jaç de Naujac dubriguèt sas pòrtas a la prima de 2006. Vos esperam plan nombroses e nombrosas dins aquèla vièlha fenial reviscolada.
Lo jaç se tròba al còr d’una bòria a 550 mètres, a dos kilomètres de La Bastida de l’Evesque, sus una de las primèras comunas del Segalar roèrgas. Sèm aquí a la tota fin del Massiu Central, o de la tota debuta... cal causir ! Vilafranca de Roèrgue, a 13 km, es plantada sus la falha que despartís dos airals geologícs, es aital a la debuta dels Causses del Carcin.
Naujac es una bòria pausada sul davalar d’un pech. Al fons li raja lo Lesèrt, un pichon riu que s’escampa dins Avairon. La rivièra passa tanben sus la comuna de La Bastida, un pont gallò-roman li passa dessús : lo pont del Caylar.
Encastre de verdura, dins un país de puèges e de combas, aboscassit, plan fresc en estiu, Naujac es al mièg de prats e lo primièr vilatge es a un kilomètre : Tèulièras, lo second a dos : La Bastida de l’Evesque. N’es una de las cinc bastidas del Roèrgue, batejada en 1280. Aquò’s lo vilatge maje de la comuna, òm i tròba ostal de la comuna, escòlas, bolanjariá (lo pan es tarrible !) offici de torisme, ostalariá, e guitonet de La Pòsta. Sus la comuna, se compta a l’entorn d’un milerat d’estajants. N’es una comuna rurala mai que mai, ame fòrças bòrias e paisans.
Per ne saure mai : vèire la bòria, çò que i a l’entorn, cossí venir, lo dintre del jaç, las disponibilitats, las
reservacions, los preses... tot lo demai, vos cal anar picar sus las autras paginas d’aquèl siti. Totes lo ligam per aquò far, aquí en naut, a drecha jós la bandièra irantja... bona
vistalha !
